Oʻzbekistonlik texnik mutaxassislar savdodagi texnik toʻsiqlar boʻyicha oʻquv seminarlarida ishtirok etdi
17.06.2024 282
Yaqinda oʻtkazilgan uchta seminar Oʻzbekiston laboratoriya xodimlari va davlat mutasaddilarga savdo qilinayotgan tovarlarga qoʻyilgan texnik talablarni qoʻllashni oʻrganishga yordam berdi.
Xalqaro miqyosda savdo qiluvchi mamlakatlar import qilinadigan tovarlarning - kimyoviy moddalardan tortib sanoat elektr burg’ulash asbobigacha, sifati va xavfsizligini ta’minlash uchun bir qator qoidalar va standartlarni qoʻllaydilar.
Jahon savdo tashkilotining Savdodagi texnik toʻsiqlar (STT) toʻgʻrisidagi bitimi ushbu texnik reglamentlar, standartlar va muvofiqlikni baholash tartib-qoidalari savdoda keraksiz toʻsiqlar yaratadigan tarzda qoʻllanilmasligini ta’minlaydi.
Oʻzbekistonning JSTga a’zo boʻlish jarayoni doirasida texnik va laboratoriya xodimlari savdo boshqaruvining ushbu texnik yoʻnalish boʻyicha keng qamrovli seminarda ishtirok etdilar. Ushbu seminar Texnik jihatdan tartibga solish agentligi soʻroviga koʻra, XSM tomonidan tashkil etildi.
May oyida uchta oʻquv seminari oʻtkazildi.
Dastlab, 14-15 may kunlari, xalqaro standart – ISO/IEC 17021-1:2015 – boshqaruv tizimi standartlarini tekshirish va sertifikatlash uchun mas’ul boʻlgan organlarning vakolati, izchilligi va xolisligiga bagʻishlandi.
20-22 may kunlari, davlat va xususiy sinov va kalibrlash laboratoriyalari hamda boshqa tegishli davlat idoralarining mutasaddilari va texnik xodimlari oʻlchovlarda metrologik kuzatuv, takroriylik va sinovlarning takrorlanuvchanligi boʻyicha bilimlarini oshirdilar. Ishtirokchilar sifat tizimi hujjatlari va atrof-muhit nazorati, shuningdek, oʻlchov noaniqligini (xatosini) baholashda qoʻllaniladigan statistik ma’lumotlar asoslari bilan tanishdilar.
23-24 may kunlari boʻlib oʻtgan uchinchi seminarda muvofiqlikni baholash organlarini akkreditatsiya qilishda xavf-xatarga asoslangan yondashuv muhokama qilindi. Xatarlarni aniqlash, xavfni baholash va xavflarni boshqarish kabi asosiy tushunchalar ochib berildi. Seminarda muvofiqlikni baholash boʻyicha qaror qabul qilishda ilm-fan va noaniqlikning roli va natijalarni qanday aniqlash kerakligi koʻrib chiqildi.
Uchala seminar ham o‘quv faoliyatini topshiriqlar va amaliy mashqlar bilan birlashtirdi. Bu nafaqat nazariy asos yaratishga yordam berdi, balki ishtirokchilarga joylarda duch keladigan vaziyatlar haqida interaktiv tajriba berish imkonini berdi.
Seminarlarda 230 dan ortiq ishtirokchi, jumladan, 93 nafar ayol va 162 nafar davlat mutasaddilari ishtirok etdi. Birinchi trening onlayn tarzda boʻlib oʻtgan boʻlsa, qolgan ikkitasi oflayn va onlayn tarzda taqdim etildi.
Seminarlar Oʻzbekistonning STT sohasida institutsional salohiyatini mustahkamlashga koʻmaklashish uchun XSM oʻtkazmoqchi boʻlgan 13 ta turkumni yakunladi.
Seminar XSM tomonidan Yevropa Ittifoqining moliyaviy koʻmagida “Oʻzbekistonning JSTga a’zo boʻlish jarayoniga koʻmaklashish” loyihasi doirasida tashkil etildi.